საქართველოს ქირურგიის მაცნე N11

მოგესალმებით პატივცემულო კოლეგებო, ძვირფასო მკითხველო. წარმოგიდგენთ გრიგოლ მუხაძის საქართველოს ქირურგთა ასოციაციის საერთაშორისო ინდექსირებადი, რეცენზირებადი, რეფერირებადი სამეცნიერო-პრაქტიკული ჟურნალის „გურამ ტატიშვილის საქართველოს ქირურგიის მაცნეს“ მეთერთმეტე ნომერს. მრავალი ხელისშემშლელი ფაქტორის მიუხედავად „გ. ტატიშვილის საქართველოს ქირურგიის მაცნე” აგრძელებს განვითარებას.

მეთერთმეტე ნომერში, უკვე ტრადიციულად, წარმოდგენილია საკმაოდ საინტერესო და ღირებული ნაშრომები, რაშიც კვლავაც თავად დარწმუნდებით. ჩემი აზრით, მეტად მნიშვნელოვანია მიმართულებების მრავალფეროვნება. აღსანიშნავია, რომ ნომერში წარმოდგენილია რამდენიმე მეტა-ანალიზი, კლინიკური მასალის რეტროსპექტული ანალიზი, ცალკეული, მეტად საინტერესო, კლინიკური შემთხვევების აღწერა და განსჯა. ასევე, იხილავთ ახალი მეთოდების გამოყენების და დანერგვის გამოცდილებას.

მინდა მოგაწოდოთ მნიშვნელოვანი ინფორმაცია – გრიგოლ მუხაძის საქართველოს ქირურგთა ასოციაციის წესდების შესაბამისად, გამგეობის სხდომაზე ჩატარდა ასოციაციის პრეზიდენტის არჩევნები. დამფუძნებელთა საბჭოს მიერ ამ თანამდებობაზე წარმოდგენილი იყო ექიმი ქირურგის, მედიცინის მეცნიერებათა დოქტორის, პროფესორ თამაზ ჩხიკვაძის კანდიდატურა. გამგეობის ყველა წევრის მხარდაჭერით პროფესორი თამაზ ჩხიკვაძე არჩეულია გრ. მუხაძის საქართველოს ქირურგთა ასოციაციის პრეზიდენტად. ვულოცავთ ბატონ თამაზს! მინდა გამოვხატო ჩემი დიდი პატივისცემა და ვუსურვო წარმატებები, ჯანმრთელობა და ყოველივე საუკეთესო.

ცალკე მინდა გამოვხატო ჩემი ღრმა პატივისცემა ასოციაციის ექსპრეზიდენტის, პროფესორ გელა არაბიძის მიმართ. საქართველოს ქირურგთა ასოციაციის პრეზიდენტად მოღვაწეობის შემდეგ, იგი აგრძელებს თავის ნაყოფიერი საქმიანობას ასოციაციის გამგეობის შემადგენლობაში. ბატონ გელას ვუსურვებთ დიდხანს სიცოცხლეს, ჯანმრთელობას და წარმატებებს.

ჩვენი ჟურნალი 2019 წლიდან ინდექსირდება რამდენიმე საერთაშორისო ვებ-პლატფორმაზე – Scientific Journal Impact Factor (SJIF), International Scientific Indexing (ISI), Academic Scientific Journals CiteFactor, Google Scholar და სხვ.

2023 წლის შეფასებით, 2021 წელს, ჟურნალის მაჩვენებელმა SJIF-ის მიხედვით შეადგინა 5.222; ISI-ის მიხედვით კი, 2021-2022 წლებში, ჟურნალში გამოქვეყნებული სტატიების ციტირების ჯამური მაჩვენებელი (Citation Values) იყო 1.492.
წარმოგიდგენთ SJIF-ის სერტიფიკატს – წინა წლებთან შედარებით „გ.ტატიშვილის საქართველოს ქირურგიის მაცნეს“ განვითარების მკვეთრად დადებით დინამიკას გვიჩვენებს.

გისურვებთ წარმატებებს და ჯანმრთელობას!
პატივისცემით,

„გურამ ტატიშვილის საქართველოს ქირურგიის მაცნეს“
მთავარი რედაქტორი დავით ჯიქია