საქართველოს ქირურგიის მაცნე N12

მოგესალმებით ძვირფასო კოლეგებო,

წარმოგიდგენთ „გურამ ტატიშვილის საქართველოს ქირურგიის მაცნეს“ ახალ, მეთორმეტე ნომერს. წინამდებარე ნომერი გამოირჩევა ქირურგიული თემების და მიმართულებების მრავალფეროვნებით. მოხარული ვარ, რომ ქირურგიული თემატიკის და ქირურგიულ პრაქტიკაში მოღვაწე ავტორების გარდა, ნომერში წარმოდგენილია მომიჯნავე დარგების სპეციალისტთა კლინიკური შემთხვევები, ასევე, საინტერესო კვლევები და დაკვირვებები.

წინამდებარე გამოცემის ერთ-ერთი საკვანძო, და ჩემი აზრით, პრაქტიკოსი ქირურგებისათვის, მეტად საინტერესო ნაშრომი გახლავთ დივერტიკულური დაავადების მართვის თანამედროვე მიდგომების მიმოხილვა, რომელიც კლინიკური რეკომენდაციების ხასიათს ატარებს. ნაშრომი მიმართულია კლინიკური ზრუნვის სტანდარტების გაუმჯობესებისკენ. მასში განხილულია მტკიცებულებებზე დაფუძნებული მიდგომები, საერთაშორისო პრაქტიკაში დამკვიდრებული თანამედროვე კლასიფიკაციები და დაავადების, როგორც კონსერვატული თერაპიის, ასევე ქირურგიული მართვის ოპტიმიზაციის საკითხები.

საინტერესოა, რომ მოცემულ ნომერში წარმოდგენილია შრომა, რომელიც განიხილავს თანამედროვე ქირურგიის და თანამედროვე აუდიოვიზუალური კულტურის კვეთის დამაინტრიგებელ საკითხებს. ჩვენ ვცხოვრობთ ეპოქაში, სადაც დომინირებს ტექნოლოგიური ინოვაციები, ამიტომ საჭიროა ხმოვან-ხედვითი მედიის და ტექნოლოგიების როლის შეფასება ქირურგიულ განათლებასა და პრაქტიკაში. იმერსიული მულტიმედიური პლატფორმების საშუალებით, ქირურგებს შეუძლიათ, გააუმჯობესონ თავიანთი სასწავლო გამოცდილება, დახვეწონ სადიაგნოსტიკო, თუ მანუალური უნარები და ხელი შეუწყონ თანამშრომლობას, გამოცდილების გაზიარებას და კლინიკური ზრუნვის ხარისხის გაუმჯობესებას გლობალური მასშტაბით.

ქირურგიის მუდმივად განვითარებად ლანდშაფტზე ნავიგაციისას, აუცილებელია, მივიღოთ და პრაქტიკაში დავამკვიდროთ პაციენტზე ორიენტირებული მოვლის და მტკიცებულებებზე დაფუძნებული პრაქტიკის თანამედროვე პრინციპები.

მინდა მადლობა გადავუხადო მკითხველს მხარდაჭერისთვის და გულწრფელად მჯერა,
რომ წარმოდგენილი ნომერი ისევე, როგორც მთლიანად ჩვენი ჟურნალის იდეა, ხელს შეუწყობს
პროფესიულ დიალოგს, თანამშრომლობას და ქირურგიის პრაქტიკის გაუმჯობესებას.

„გურამ ტატიშვილის საქართველოს ქირურგიის მაცნეს“
მთავარი რედაქტორი დავით ჯიქია