საქართველოს ქირურგიის მაცნე N9

რედაქტორის წინასიტყვაობა

მოგესალმებით კოლეგებო, ხანგრძლივი შესვენების შემდეგ, წარმოგიდგენთ საქართველოს გრ.მუხაძის ქირურგთა ასოციაციის რეცენზირებადი, რეფერირებადი სამეცნიერო-პრაქტიკული ჟურნალის „გურამ ტატიშვილის საქართველოს ქირურგიის მაცნეს“ მეცხრე ნომერს.

კოვიდ-პანდემიის და სხვა ობიექტური მიზეზების გამო, შეფერხდა ჩვენი ჟურნალის ბოლო ნომრის ფორმირება და გამოცემა. თუმცა მინდა მოგაწოდოთ ინფორმაცია, თუ რა ნაბიჯები გადაიდგა საქართველოს გრ.მუხაძის ქირურგთა ასოციაციის გამგეობის და ჟურნალის რედაქციის მხრიდან „გურამ ტატიშვილის საქართველოს ქირურგიის მაცნეს“ შემდგომი განვითარების და ზრდისათვის.

2018 წლიდან ჟურნალი გახლავთ რეცენზირებადი, გამოიყენება რეცენზირების 3 ვარიანტი, რომლის განხორციელებაც ჟურნალს ძალუძს:
- „რეცენზირება მთავარი რედაქტორის მიერ“ (“main editor peer review”): მხოლოდ მთავარი რედაქტორი ახდენს ყველა სტატიის რეცენზირებას და შერჩევას პუბლიკაციისათვის (დაბალი დონე, დაბალი შეფასება);
- „ღია რეცენზირება“ (“open peer review”): რეცენზენტმა და ავტორმა იციან ერთმანეთის ვინაობა; ითვალისწინებს სამ ან მეტ რეცენზენტს თითოეული გამოცემის ყველა სტატიისათვის;
- „ცალმხრიული ფარული (ანონიმური) რეცენზირება“ (“single blind peer review”): რეცენზენტმა იცის ავტორის ვინაობა, ავტორმა კი არ იცის რეცენზერტის ვინაობა; ითვალისწინებს სამ ან მეტ რეცენზენტს თითოეული გამოცემის ყველა სტატიისათვის;
2018 წლიდან ჟურნალი რეფერირდება „ქართულ რეფერატულ ჟურნალში“.
2020 წლიდან შეიქმნა ჟურნალის ორენოვანი (ქართული, ინგლისური) ვებ-გვერდი (www.surgery.edu.ge). მიმდინარეობს ვებ-გვერდის სრულყოფა და მორგება აკადემიურ საძიებო სისტემებზე.
2020 წელს ასოციაციის გამგეობის გადაწყვეტილებით დაიწყო აქტიური მუშაობა საერთაშორისო სამეცნიერო და საძიებო ბაზებში ჟურნალის ჩასართავად;

სრულად ნახვა

ამდენად, საქართველოს გრ.მუხაძის ქირურგთა ასოციაციის გამგეობის და ჟურნალის რედაქციის მხრიდან გადაიდგა მნიშვნელოვანი ნაბიჯები, რაც განაპირობებს ჟურნალის ჩართვას თანამედროვე საერთაშორისო აკადემიურ ბაზებსა და საძიებო სისტემებში. სამწუხაროდ, ამ პროცესებს აბრკოლებს მიმოხილვითი, სამეცნიერო-პრაქტიკული, კვლევითი თუ სხვა ტიპის ნაშრომების მკვეთრი დეფიციტი. მხოლოდ თქვენი, საქართველოს ქირურგიული და მთლიანად სამედიცინო საზოგადოების წევრების, ავტორების, მკითხველების აქტიურობაზეა დამოკიდებული ამ მნიშვნელოვანი წამოწყების მომავალი და პროგრესი.

წარმოდგენილი, მეცხრე, ნომერი მეტად მრავალფეროვანია. ნომერში მოცემულია როგორც მიმოხილვითი, კვლევითი ნაშრომები, ასევე წარმოდგენილია კლინიკური რეკომენდაციები და მეტად საინტერესო კლინიკური შემთხვევები.